dantzan.com-ek gure babesa behar du

Hamar urte martxan egon ondoren, iazko urtean  itxi egin behar izan zuten gaur egun euskal dantzaren erreferente ezinbestekoa dugun dantzan.com gunea. Dantzaren sektorearen erantzun eta bultzadari esker, orain 5 hilabete berriz ere ireki ahal izan zituen bere leihoak, baina itxiera berri baten aurrean aurkitu daiteke beste behin ere, dituen behar ekonomiko urriei aurre ezin dielako egin.

Zeharo paradoxikoa da, berriki komunikabideen ARGIA saria jaso duen honek, ezin iraun ahal izatea, are gehiago, dituen diru-beharrak oso txikiak izanik. Teknologia eta baliabide aurreratunez diseinatua egoteak, eta dantza-komunitate handi baten partehartzea izanik, oso produktu efizientea  bilakatzen du. Baina dantzaren sektoreak bereziki lehendik ere laguntza handirik jasotzen ez zuenez, are larriagoa da etorkizunean datorkiguna.

Dantza-taldeok oso garbi daukagu ezinbesteko erraminta dugula (dokumentazioa, informazio-trukaketa, ikerketa, kohesioa...) eta horregatik jarri dugu martxan dantzan.com diruz ere laguntzeko kanpaina hau.

Ez dugu asko eskatzen, ez baita asko behar duguna. Baina bai da izugarri beharrezkoa gure aurrera begirako jardunbiderako.

Ahal baduzu, eman zure babesa. Asko gara, eta denon artean aterako dugula ziur gaude.

Hemen egin dezakezu: http://www.dantzan.com/albisteak/nik-ere-babesten-dut-dantzan-com

Zabaldu kanpainaren berria baita zuen sareetan ere: facebook, twitter...

Bizi dantzan !

Dantzan bizi !

Idiazabalen soka-dantza berreskuratuko dute igandean

Atzoko entsegu orokorrean dena prest geratu da. Animo eta umore handiz prestatu zaizkigu Idiazabalgo lagunak. Ondo bidean, hamar zinegotzik eta herriko lau dantzarik osatuko dute soka, norbere bikoteekin, igandean 13:30etatik aurrera.

Soka-dantza joan den mendearen erdialdean utzi zitzaion egiteari Idiazabalen. 1997an, Ikerfolkeko lagunekin batera, eta Antton Irizar zena alkate-aurresku zela, agintarien soka-dantza gisa ateratzen lagundu genien Aurtzakakook.

Aurten, ohitura hori berreskuratzeko gogoa erakutsi ziguten, eta garai batean, Idizabalgo dantzari zaharrei jaso genien moduan egiteko proposamena eta laguntza luzatu diegu. Besteak beste, bertan dantzatzen zuten zortzikoaren aldaera egingo da. Gainera, aurtengoan, kanpoko dantzarien beharrik gabe osatuko da soka, azeri-dantza egingo duten zinegotziez gain, bertako 4 dantzariek dantzatuko bait dituzte agurra, desafio eta zortzikoak. Eta bikain egiten dutela esan beharra daukagu gainera.

Oso poztekoa da guretzat albistea, eta igandekoaren zain, zorionak eta animo gaur bertatik.

gu ere dantzan.com bizi gara

berpiztu da dantzan.com

Berriz daukagu martxan, baina hau ez da amaitu. Etenaldia ekarri zuen egoera (finantziaketa falta) ez da konpondu. Horregatik, dantzan.com-en aldeko kanpaina jarri dugu martxan.

Benetan esanguratsuak izan ziren urtearen hasieran sinadura kanpainan jaso genituen atxekimenduak (1666, orain arte, mundu guztikoak. Hemen ikus ditzakezu), bai dantzan.com-eko arduradunei eta babes-taldeari adorea emateko, bai diru-laguntza eman duten erakundeei (Gipuzkoako Foru Aldundia, Bizkaiko Foru Aldundia, Eusko Jaurlaritza) zerbitzu honen oihartzuna erakusteko. Orain, webgunea biziberrituta dator, eta besteak beste, erabiltzaileon parte hartzera gehiago irekita.

Momentu honetan hasi dugun kanpainan modu hauetan parte har dezakegu:

• <dantzan> posta zerrendako kide eginez.
• dantzan.com komunitatean sartuz.
• twitter bidez jarraituz dantzan.com
• Atsegin dut dantzan.com facebooken jarriz
• bizi dantzan - dantzan bizi irudia erabiliz

Animatu eta parte hartu aipatutako edozein modu hauetan.

Ezpata andaluziar eta euskaldunak Igartzan

Kofradiaren bandera berria ikur dizdiratsu genuela eman genion hasiera gure 2012ko egunari, joan den irailaren 8an, Loinazko Amaren egunean. Bandera Iruñako “Nuevo Barroco” etxeko lagunek egin digute, abiapuntu Igartzako etxeko armarria eta sanandres erako gurutzea izanik, Beasaingo herriarenaren erreferentziaz, hiru kolore eta damasko oihal zuria oinarri. Armarrian, urrezko behia haren kumearekin eta zilarrezko mailudun eskua dagertza.

Ezpatei ere bertako identifikazioa eman diegu, gure dominaren irudia txertatuz.

Buruzagia eta 40 ezpata-luzeko segizioa osatu genuen, guztira 50 dantzari, banderazale, azkendari eta kapitainen artean. Poz izugarriz ikusi genuen Joseba Juarez beste behin ere gidari lanetan eta bandera berria zubiko larrosaren gainean maisuki dantzatzen. Sekula baina gorago ikusi da gainera bandera, larrosa buruen gainetik altxatu baikenuen.

Aipatzekoen artean daukagu, aurten lehen aldiz, kapitain azkendarien jarduna lau emakumezkoek osatu dutela: Agurtzane Agirre, Maider Arruabarrena, Izaskun Salazar eta Garaitz Velez.

Gurekin batera izan genituen egun guztian zehar, Huelvako Puebla de Guzman-eko ezpata-dantzariak, bai, ezpata-dantzariak! buruko zintaren ordez gure zapia jantzi bagenie, bertan-bertakoak ziruditenak, bai itxuraz, bai dantza-moldez. Hala bukatu zuten ia denek izenak aldatuta: Pepe “Patxi”, Tomás "Txomin", Diego “Didaka”, Evaristo “Joxeluis Korta” ... Jozé tanborileroa ezik: nahiz eta gaita/txistua eta tanboril/danbolina gure Josebaren modu berdintsuan jo, bere “plantak” nahastezina bihurtzen zuen. Hemen dagoeneko galduta dauzkagun danbolinteroaren presentzia, funtzio, mugimendu eta aginpidea erakutsi zituen, “bakarlari” gisa arituta bakarrik burutu daitezkeenak.

Hermandad de Ntra. Sra. de la Peña-ko dantzari hauek urtero dantza egin ohi dute apirilaren azken igandean Amabirjinaren ohoretan ospatzen duten erromeri jendetsuan. XVII. mendean Korpus-etan eta San Roke patroiaren egunean dantzatzen omen zuten. Dantza hau Andaluziako Ondare Historikoaren Katalogoan jasota dago, 7-13 dantzari bitarteko taldeetan egin ohi dute, eta gidari joaten den “capitán” lehen dantzariak markatzen dizkio ilarari dantzarako urrats eta adierazpideak, libre daraman eskuaz. Ikusgarria da, “rabeón” izeneko azken dantzariak lurra ezpatez nola “orrazten” duen ikustea. (bideoa)

Baina izan dugu zer ospatu gehiago ere, aurten Salleko Adiskideak-ek (Aurtzakaren hastapeneko taldeak) 40 urte bete baititu. Taldeko partaide izandako hainbat lagun etorri zitzaigun gurekin batera bazkaltzera eta bide batez, taldeko sortzailea izan zen eta egun Kofradiako Ohorezko kide genuen Raimundo Gamaio omendu nahi izan genuen, bere familiari lore sorta bat eskainiz, eta ezpata-dantzaren bukaeran, berarekin batera dantzatzen genuenok Pello Joxepe “Luzea” izeneko dantza eginez.

Bukaeran, aurtengo izendapenak egin genituen. Aurreko urteetan ez zuen etortzerik izan, eta zor genion aipamena Jesus Mari Garate lagunari, gutako askoren dantza-maisua izan dena. Merezimendu osoz, Ohorezko kofradiakide izendatu genuen.

Eta ohiturari jarraituz, Jauregian babarrunak eta odolkia bazkaldu genituen, dantzariei dominak partitu zitzaizkien eta erromeria ospatu genuen Arrabots taldekoen laguntzaz.

Hemen ikus daitezke Iñaki Erauskinek, Andoni Muruak eta Patxi Goikoetxeak ateratako argazki gehiago.

https://picasaweb.google.com/aurtzaka/Igartza2012?authkey=Gv1sRgCMPG-vaR0Lb83wE#

Hemen bideoak:

http://www.gitb.info/index.php?option=com_hwdvideoshare&task=viewvideo&Itemid=10&video_id=2786

http://www.youtube.com/watch?v=6BXBR1FoNQM&feature=relmfu

http://www.youtube.com/watch?v=_lwZbCDII1c&feature=BFa&list=UL6BXBR1FoNQM

http://www.youtube.com/watch?v=2D_eZNDtuGw&feature=BFa&list=UL_lwZbCDII1c

Eta hemen hemeroteka:

http://beasain.hitza.info/2012/09/11/ezpata-hotsak-aita-pontekoa-gogoratzeko-2/

http://beasain.hitza.info/2012/09/08/dantzariek-euren-eguna-ospatu-dute-goizean-beasainen/
http://www.diariovasco.com/v/20120909/tolosa-goierri/rito-espadas-vascas-andaluzas-20120909.html