Zaldibian kitatutako zorrak

Orain 200 urte inguru dantzari zaldibitarrak joaten ziren Beasaina ekitaldi garrantzitsuak zeudenean. Ez Beasaina bakarrik, baita inguruko herri orotara ere. Ezaguna eta ezagutua zen haien dantzarako jakinduria eta abilezia. Ordainetan, joan den igandean, Beasaindik goierritar dantzariz osatutako talde bat joan ginen Zaldibira. Eta aspaldi hartan dantzari zaldibitarrek egiten zituzten dantzak eraman genizkien itzuleran.

Serbiako bira (2009)

Abuztuaren 13tik 17ra bitartean Serbiako Pirot hirian ospatu den V.Nazioarteko Folklore jaialdian izan gara aurten. Bertako Dom Culture elkartea da 5 urtez jaialdi hau antolatzeaz arduratzen dena eta aipatzekoa da bai jaialdiaren antolakuntza eta baita jaso dugun harrera ere ezin hobeak izan direla. 4 egunez bertako dantza taldeko kide bat, Aleksandra, izan dugu gida lanetan egunero gurekin eta hari zein hasieratik gure harremanetarako bide izan den zein antolakuntzako buru dela esan genezakeen Baçan-i gure eskerrik beroenak luzatu nahi dizkiegu hemendik.